Saturday, July 11, 2009

Say No to GMA !

“Magpaka-bato ayun na lamang ako”

Iyan ang katagang unti-unting bumubuo at pilit na sinasasakop ang kabuuan ng ating isipan sa tuwing may nababalitaan tayong anomalya na kinasasangutan ng “public officials” na tayo mismo ang naghalal. Mas pinipili na lamang natin ang magbulagbulagan at magpakamanhid sa masaklap at di katanggap tanggap na katotohanan. Hindi na tayo nagugulat sa laki ng perang kinukurakot at pinangsusuhol sa kung kani-kanino para lamang manahimik ang nagdudutdot sa akusado. Kahit karamihan sa atin ay sukang-suka na sa mga nangyayari, ayaw na lamang nating kumilos dahil alam nating wala ding mangyayari. Papagurin lang natin ang ating sarili at mabibilad lang tayo sa init ng araw sa kaka-rally. Para ano? Para mapalitan ang kasalukuyan nakaupo sa gobyerno ng mga bagong mangungurakot? Kaya naman tuwang tuwa ang mga nasa pwesto dahil alam nilang suko na tayo! Pero hindi. Wag! Hindi nararapat at lalong hindi karapat-dapat manahimik na lamang sa isang sulok at magbingibingian sa totoong nangyayari sa lipunan! Isang kahibangan ang pagpili ng mali at lalong hindi maitatama ng isang pagkakamali ang isang pang pagkakamali.


Wala ng kahihiyan ang mga nasasangkot sa ibat-ibang anomalya bagkus pakapalan ng mukha ang namamayani sa mga tinatawag nating "public servants". Ang mga magnanakaw sa gobyerno, kahit huling-huli sa akto ay buong tapang na haharap sa camera at pilit na gagawing puti ang itim, gagawing kapuri-puri ang masama at pilit na pinipilipit ang katotohanan. Tama na. Sobra na. Kailangan na nating lumaban para sa katotohanan!


Napakalala na ng krisis na hinaharap ng ating bansa. Marami ng mamamayan ang diskuntento sa kasalukuyang rehimen kung kayat kailangan na nating ng ibayong pagpapalakas sa pagkakaisa at pagibayuhin ang pakikibaka ng ating kababayan para maipalaban natin ang karapatan na naaapakan ng makapangyarihan, mayayaman at maimpluwensya. Kailangan natin ng pagtutulungan upang matamo ang pambansang kalayaan para na rin sa ikauunlad ng bawat isa sa atin.


Ang lakas at kapangyarihan ng masa ang siyang magpapasya. Tayo’y makipagisa sa mga progresibong hanay at positibong pwersa. Buuin natin ang mga taktikal na alyansa at pormasyon na may malinaw na pagkakaisa at paninindigan. Aktibo nating gampanan ang ating katungkulan, responsibilidad at obligasyon [o kung anu man ang twag dun] bilang mamamayan ng bansang Pilipinas – Bayan ng Perlas ng Silanganan. Palakasin at palawakin natin ang ibat-ibang kilusan na tulad nati’y sawa na sa takbo ng pamamalakad ng maituturing nating nasasakdal. Darating din ang tamang panahon na magtatagumpay ang ating ipinaglalaban.


“The people united, will never be defeated!”


Sobra na, Tama na, Patalsikin na natin siya!
No to Charter Change! Enough of Gloria!
Panagutin sa ginawang krimen sa taong bayan.

1 comments:

Led July 11, 2009 at 6:44 AM  

Ayos 'to! Tama...Taong bayan ang magpapasya.

Isigaw natin!

  © Blogger template Brooklyn by Ourblogtemplates.com 2008

Back to TOP